Labele Sai Líder ho Nervozu

Sra. Aliança de Araújo, Deputada PNT ba Parlamento Nacional

Atu dezenvolve futuro nasaun ida ne’e ba oin, presiza haburas demokrasia, labele kria bebeik situasaun ida ke ladún fo valor ba ita nia kultura. Dalabarak ema dehan ita nia kultura sai hanesan kultura funu. Maibe buat hirak ne’e dala ruma hatudu ona realidade ba ita hotu, e ema barak nebe moris iha situasaun ida ne’e hatene ona.

Ema hotu presiza kontribui maka’as liutan atu ita hadia fila fali unidade nasional nebe lakon, naksobu no nakfera iha situasaun krize ida ne’e nia laran.

Haka’it ho ideias hanesan nee mak jornalista Time Timor hakarak dada-lia uitoan ho Sra. Aliança da Costa Araújo, iha ninia rezidênsia Fatuhada, Dili (07/04). Tuir Sr. Aliança nebe hanesan membru parlamentu husi Partido Nacionalista Timorense (PNT), ema Timor-oan hotu tenki kolabora ba malu hodi bele simu malu hanesan ama ida de’it atu hadia hikas país ida ne’e. Ita iha programa barak mak diak no furak, maibe kmanek liu-liu ba programa dezenvolvimentu Edukasaun Saúde, Ekonomia, Agrikultura no Kultura. Buat hirak nee esensial liu ba ita nia vida lor-loron nian, atu nune’e ema ida-idak bele partisipa no halao knar ida ne’e ho diak.
***

Keta Fahe Povu....!
Maibe, wainhira ita hahú dezenvolve programas hirak nee, presiza esforsu-án halao knar nebe diak. Ema nebe iha kbit no kapasidade presiza tulun maluk nebe laiha kbit, atu nune’e ema idak-idak bele moris iha hakmatek no liberdade nia laran. Sra. Aliança nebe nudar mos Dr. Abílio Araújo (fundador PNT) nia alin-feto nee mos realsa katak ita labele hein deit orsamento husi estado no ita labele hein deit nasaun doadores sira mak tenki suporta bebeik ita. Maibe ita presiza fo kontribuisaun no hanoin, nune’e bele buka rasik buat nebe mak ita hakarak hodi bele realiza ita nia vida lor-loron nian.

Ukun-na’in sira labele ukun povo ho politiku deit, maibe ukun povo ho kapasidade nebe diak, atu nune’e povo bele moris iha hakmatek no haksolok nia laran, hodi nunee populasaun labele moris bebeik iha terus nia laran.

Tuir Dona Aliança nia vizaun, iha situasaun ida ne’e, ema barak mak sai vítima no lakon sira nia isin tan deit ema seluk nia interese. Ita la’os hasoru problema ho ema husi rai liur mak mai atu soran ita, maibe ita nia nai-ulun sira rasik mak ukun ita ho sira nia polítiku oi-oin hodi hafahe ita iha tempo krize ida ne’e.

Tanba ida, nia hatutan, wainhira ita hasoru problema, kria violênsia, hodi hafahe unidade nasional, ita rasik mak terus no sofre, ema seluk hamnasa ita wainhira ita hasoru hela dizafius hanesan ne’e. Entaun ho hanoin sira ne’e ita presiza fo fiar ba malu, fo apoio ba malu no suporta ba malu, atu ho ema hotu nia hanoin nebe diak bele lori nasaun ne’e ba oin. Senhora Deputada nee mos afirma katak ita idak-idak bele fo responsabilidade no siguransa másimu atu nune’e nasaun ne’e la’o ho hakmatek no lamonu tan inimigus sira nia liman.

Presidente PNT sei Kandidata ba Eleisaun Lejislativa
Kestiona kona ba PNT nebe la kandidata nia ema ba Eleisaun Prezidensial nee, Dona Aliança fó-razaun katak PNT labele kandidata-án ba eleisaun presidensial ne’e, tanba kandidatu nebe atu konkore iha jogu demokrátiku nee barak liu ona. Ita nia nasaun mos kiikoan no povu mos oituan deit, se ita partidus hot-hotu tenki kandidata nia ema, dalaruma bele sai konfuzaun boot ba ita nia nasaun ne’e.

Senhora nee mos esplika katak ita labele ho arogánsia no labele hadau kadeira deit atu ukun rai ida nee, maibe ita mos tenki haré katak ita nia nee populasaun uitoan deit. Tanba ida ne’e PNT kumpri ninia prinsipiu hodi la hato’o ninia kandidatura ba Eleisaun Prezidensial ne’e. “Maibe ami sei kandidata ami nia Presidente ba Eleição Legislativa ba kargu Primeiro Ministro iha eleisaun nebe tuir mai”, Dona Aliança afirma hodi hatutan tan katak durante ne’e sira esforsu-án maka’as hodi hala’o didiak sira nia programa para oinsa bele realize duni iha eleisaun lejislativu iha fulan rua mai nee.

Tanba ne’e mos, tuir senhora nee, sira hato’o ba lideres sira iha nasaun ne’e katak wainhira iha eleisaun lejislativu karik, rezultadu manan ka lakon ita tenki evita violência no ita tenki simu laran diak atu labele hamosu bibeik situasaun nebe ke ladun fo vantajen diak ba ita nia nasaun no ba ita nia povo.

Seidauk halo Koligasaun ho Partidus seluk
Dona Deputada nee mos rekonyese katak durante nee PNT seidauk halo koligasaun ho partidus polítikus sira seluk ho razaun katak sira mos iha experiênsia atu halao programa rasik no bele lidera nasaun no povo atu bele hakat ba oin iha futuru nebe mai. “Neduni ami mos seidauk suporta ema ida tanba ami sei hare ba ninia hahalok, kapasidade no experiênsia iha nasaun liur no iha nasaun ne’e nia laran”, realsa Sra. Aliança hodi dehan tan katak PNT foin atu hare oinsa bele kandidata nia ou bele hili nia nudar reprezentante povo nian iha nasaun ida ne’e.

Senhora nee hatutan tan katak sira lakohi hili ema ida nebe laiha kbít no laiha kapasidae, no laiha responsabilidade ba povo nia nesisidade, tanba wainhira nia iha emosional entaun nia ukun nasaun ne’e la ba oin no la sai diak. Neduni, tuir nia vizaun, atu sai nai-ulun nebe diak ba nasaun ida ne’e, ita labele ho nervosu deit, tenki ho pasiênsia. Importante liu mak ema nebe iha experiênsia, kalma no matenek, atu nunee PNT mos bele fo apoiu no hili nia hanesan Chefe de Estado nebe diak iha ita nia rai laran hodi ukun nasaun ida ne’e ho diak no hakmatek.

Tenki Hili Dalan Lós no Justo....!
Ita nia senhora nebe kalma teb-tebes nee mos realsa katak to’o agora sira seidauk iha hanoin ida nebe klaru no kle’an kona ba kandidatu ida nebe mak sira atu suporta ba kargu Presidente da República, maibe sira sei hein atu kandita sira nia lider ida nebe iha esperiênsia, kapasidade, no matenek iha Eleisaun Lejislativu oin mai. Tamba, tuir nia haré, durante ita akompanha programa nebe hato’o husi kandidatus sira ne’e mesak diak no fur-furak, maibe dalabarak la hatudu realidade nebe los no justu ba ita nia povo.

Tanba ida ne’e mak, tuir nia vizaun, sira hakarak hato’o ba lideres sira katak, ita labele promete buat nebe sedauk iha realidade ba ita nia povo, maibe ita tenki iha esperansa no servisu maka’as liutan, atu nune’e ita bele hadi’a ita nia rain no haburas kultura nebe durante ne’e hetan estragus husi ema dezkonyesidus sira. Kuando ita hakarak sai husi krize boot ida ne’e, ita tenki tau ema ida nebe ke iha kapasidade, matenek no iha esperiênsia boot hodi hadomi no hadi’a povo nia moris, atu nune’e ita labele moris bebeik iha inferno nia laran.

Tan hahalok sira ne’e, Sra. Alança sei relembra, mak uluk sira promete ba povo buat barak lahalimar, maibe ikus mai oituan deit mak sira halo tuir no barak liu mak la realiza. Entaun, tuir nia hanoin, husi ohin ba oin ita hot-hotu nia matan nakloke ona, e fihir no hili dalan los no justu atu nune’e ita labele monu tan iha dezafiu boot nebe ita infrenta ona durante nee.■ (Oji).